თამბაქოს მოხმარებას ყველაზე ეფექტურად ავსტრალიის სკოლებში ებრძვიან, იქ ყველა სკოლას მოეთხოვება შეიმუშავოს თამბაქოს მოხმარების რეგულირებისა და პრევენციის პოლიტიკა. სხვა ქვეყნებში მსგავსი პოლიტიკის ქონას კერძო სკოლები მოსწავლეთა მოსაზიდად იყენებენ. ავსტრალიული სკოლების თამბაქოს მოხმარების რეგულირების პოლიტიკა ორი ძირითადი კომპონენტისაგან შედგება: ტექნიკური და შინაარსობრივი: ტექნიკური მხარე გულისხმობს, რომ სკოლის ტერიტორიაზე თამბაქოს მოხმარება აკრძალულია ყველასთვის, თუ მოსწავლე შემჩნეული იქნება თამბაქოს მოხმარებში დაუყოვნებლივ ხდება მშობლის ინფორმირება. იმ უფროსკლასელი მოსწავლეებისთვის, რომლებსაც არ შეუძლიათ მთელი დღის განმავლობაში თავი შეიკავონ თამბაქოს მოხმარებისგან გამოყოფილია სპეციალური ოთახი, სადაც მოსწავლეებს შესვლის უფლება აქვთ დღის განმავლობაში მხოლოდ ერთჯერ. ოთახი იზოლირებულია სკოლის ძირითადი ნაწილისაგან. რაც შეეხება შინაარსობრივ მხარეს, ძირითადად მიმართულია პრევენციაზე და მომხმარებელთა რაოდენობის შემცირებაზე. დადგენილია, რომ მშობელს უდიდესი გავლენა აქვს ამ კუთხით, ამიტომ სკოლები მშობლებს ურიგებენ შესაბამის ბუკლეტებს. მწეველი მოსწავლეებისთვის ავსტრალიის სკოლებში შექმნილია ეგრეთ წოდებული”მწეველთა კლინიკები”, რომელსაც კურირებს სკოლის ექთანი, აღნიშნულ კლინიკებში მოსწავლეებს კვირაში ერთჯერ უტარდებათ სემინარები, ასევე სკოლის ექთანი ინდივიდუალურად ეხმარება მოსწავლეებს, რომ მათ თავი დააღწიონ თამბაქოს.